---
title: "തലശ്ശേരി സേക്രഡ് ഹാർട്സ് ഗേൾസ് ഹൈസ്കൂളിലെ 1976-ലെ എസ്.എസ്.എൽ.സി ബാച്ചിന്റെ സുവർണ ജൂബിലി ആഘോഷമായ “ലെഗസി 50” ഹോട്ടൽ നവരത്‌നയിൽ  സംഘടിപ്പിച്ചു."
english_title: "“Legacy 50”, the golden jubilee celebration of the 1976 SSLC batch of Sacred Hearts Girls High School, Thalassery, was organized at Hotel Navaratna."
publisher: "thalasserynews.in"
canonical_url: "https://thalassery.truevisionnews.com/news/353948/legacy-50-the-golden-jubilee-celebration-of-the-1976-sslc-batch-of-sacred-hearts-girls-high-school-thalassery-was-organized-at-hotel-navaratna"
published_at: "2026-04-18T09:33:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/69e302989e8fb_Untitled-1_copy.jpg"
keywords: []
---

# തലശ്ശേരി സേക്രഡ് ഹാർട്സ് ഗേൾസ് ഹൈസ്കൂളിലെ 1976-ലെ എസ്.എസ്.എൽ.സി ബാച്ചിന്റെ സുവർണ ജൂബിലി ആഘോഷമായ “ലെഗസി 50” ഹോട്ടൽ നവരത്‌നയിൽ  സംഘടിപ്പിച്ചു.

> **Lead Summary:** > തലശ്ശേരി സേക്രഡ് ഹാർട്സ് ഗേൾസ് ഹൈസ്കൂളിലെ 1976-ലെ എസ്.എസ്.എൽ.സി ബാച്ചിന്റെ സുവർണ ജൂബിലി ആഘോഷമായ “ലെഗസി 50” ഹോട്ടൽ നവരത്‌നയിൽ സംഘടിപ്പിച്ചു.വർഷങ്ങൾക്കിപ്പുറം ഒരുമിച്ചുകൂടിയ സഹപാഠികളുടെ സ്നേഹവും സൗഹൃദവും നിറഞ്ഞുനിന്ന സംഗമമായി പരിപാടി മാറി.

## Article Content

> തലശ്ശേരി സേക്രഡ് ഹാർട്സ് ഗേൾസ് ഹൈസ്കൂളിലെ 1976-ലെ എസ്.എസ്.എൽ.സി ബാച്ചിന്റെ സുവർണ ജൂബിലി ആഘോഷമായ “ലെഗസി 50” ഹോട്ടൽ നവരത്‌നയിൽ സംഘടിപ്പിച്ചു.വർഷങ്ങൾക്കിപ്പുറം ഒരുമിച്ചുകൂടിയ സഹപാഠികളുടെ സ്നേഹവും സൗഹൃദവും നിറഞ്ഞുനിന്ന സംഗമമായി പരിപാടി മാറി.

മുതിർന്ന അധ്യാപികമാരായ പുഷ്പയും നിർമലയും ചേർന്ന് നിലവിളക്ക് കൊളുത്തി പരിപാടി ഉദ്ഘാടനം ചെയ്തു. തുടർന്ന് പൂർവ വിദ്യാർത്ഥികൾ അധ്യാപകരെ പൊന്നാട അണിയിച്ച് ഉപഹാരങ്ങൾ നൽകി ആദരിച്ചു. ഗുരുക്കന്മാരോടുള്ള ആദരവും നന്ദിയും നിറഞ്ഞ നിമിഷങ്ങൾ എല്ലാവർക്കും ഏറെ സ്മരണീയമായി.

വർഷങ്ങൾക്ക് മുമ്പ് വിദ്യാലയത്തിൽ ആലപിച്ചിരുന്ന സ്വാഗതഗാനം പൂർവ വിദ്യാർത്ഥികൾ ഒരുമിച്ചാലപിച്ചതും ചടങ്ങിന്റെ പ്രത്യേക ആകർഷണമായി. പഴയ ക്ലാസ് മുറികളും, കളിസ്ഥലവും, അധ്യാപകരുമായുള്ള ഓർമ്മകളും പങ്കുവെച്ചപ്പോൾ വേദി വികാരനിർഭരമായി. പൂർവ വിദ്യാർത്ഥികളായ ഷെറിന, ശ്യാമള, ശ്യാമ എന്നിവർ സംസാരിച്ചു.

ഉച്ചഭക്ഷണത്തിന് ശേഷം കലാപരിപാടികളും വിവിധ കളികളും സംഘടിപ്പിച്ച് പഴയ കൂട്ടുകാർ വീണ്ടും ബാല്യത്തിലേക്ക് മടങ്ങിയ അനുഭവങ്ങൾ സൃഷ്ടിച്ചു.

> അധ്യാപകരും തങ്ങളുടെ പഴയ അനുഭവങ്ങളും വിദ്യാർത്ഥികളുമായുള്ള ബന്ധങ്ങളും പങ്കുവെച്ചത് ചടങ്ങിനെ കൂടുതൽ ഹൃദയസ്പർശിയാക്കി. കാലം മാറിയാലും സൗഹൃദവും വിദ്യാലയ ഓർമ്മകളും എന്നും പുതുമയോടെ നിലനിൽക്കുന്നതിന്റെ നല്ലൊരു തെളിവായി “ലെഗസി 50” മാറി.

### Related Links & Sources
- [Original Story Source](https://thalassery.truevisionnews.com/news/353948/legacy-50-the-golden-jubilee-celebration-of-the-1976-sslc-batch-of-sacred-hearts-girls-high-school-thalassery-was-organized-at-hotel-navaratna)