---
title: "നിയുക്ത പ്രതിപക്ഷ നേതാവ് പിണറായി വിജയനെ വസതിയിലെത്തി സന്ദര്‍ശിച്ച് നിയുക്ത മുഖ്യമന്ത്രി വി ഡി സതീശന്‍ ; മുൻസർക്കാർ കൊണ്ടുവന്ന വികസന പ്രവർത്തനങ്ങൾ തുടരുമെന്ന് വി.ഡി."
english_title: "Chief Minister-designate VD Satheesan visited the residence of designated Opposition Leader Pinarayi Vijayan and said that the development works brought by the previous government will continue."
publisher: "thalasserynews.in"
canonical_url: "https://thalassery.truevisionnews.com/news/359593/chief-minister-designate-vd-satheesan-visited-the-residence-of-designated-opposition-leader-pinarayi-vijayan-and-said-that-the-development-works-brought-by-the-previous-government-will-continue"
published_at: "2026-05-15T14:21:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/6a06dfe499246_6a06c8a969b46_vd_and_pv.jpg"
keywords: []
---

# നിയുക്ത പ്രതിപക്ഷ നേതാവ് പിണറായി വിജയനെ വസതിയിലെത്തി സന്ദര്‍ശിച്ച് നിയുക്ത മുഖ്യമന്ത്രി വി ഡി സതീശന്‍ ; മുൻസർക്കാർ കൊണ്ടുവന്ന വികസന പ്രവർത്തനങ്ങൾ തുടരുമെന്ന് വി.ഡി.

> **Lead Summary:** നിയുക്ത പ്രതിപക്ഷ നേതാവ് പിണറായി വിജയനെ സന്ദര്‍ശിച്ച് നിയുക്ത മുഖ്യമന്ത്രി വി ഡി സതീശന്‍. തിരുവനന്തപുരത്തെ പിണറായി വിജയന്റെ വാടക വീട്ടിലെത്തിയായിരുന്നു സന്ദര്‍ശനം. പിണറായി വിജയന്‍ ചിരിച്ച് കൊണ്ട് കൈ കൊടുത്താണ് വി ഡി സതീശനെ സ്വീകരിച്ചത്.

## Article Content

നിയുക്ത പ്രതിപക്ഷ നേതാവ് പിണറായി വിജയനെ സന്ദര്‍ശിച്ച് നിയുക്ത മുഖ്യമന്ത്രി വി ഡി സതീശന്‍. തിരുവനന്തപുരത്തെ പിണറായി വിജയന്റെ വാടക വീട്ടിലെത്തിയായിരുന്നു സന്ദര്‍ശനം. പിണറായി വിജയന്‍ ചിരിച്ച് കൊണ്ട് കൈ കൊടുത്താണ് വി ഡി സതീശനെ സ്വീകരിച്ചത്.

പിണറായിക്കൊപ്പം ഭാര്യ കമലയും മകള്‍ വീണയും കൊച്ചുമകനും സതീശനെ സ്വീകരിച്ചു. വി കെ പ്രശാന്തും വീട്ടിലുണ്ടായിരുന്നു. 2016ല്‍ മുഖ്യമന്ത്രിയായി സ്ഥാനം ഏറ്റെടുത്തപ്പോള്‍ മുന്‍ മുഖ്യമന്ത്രിയായിരുന്ന ഉമ്മന്‍ ചാണ്ടിയെ പിണറായി വിജയന്‍ സന്ദര്‍ശിച്ചിരുന്നു.

അഞ്ച് വര്‍ഷം മുഖ്യമന്ത്രിയും പ്രതിപക്ഷ നേതാവുമായി പോരടിച്ച പിണറായി വിജയനും വി ഡി സതീശനും തമ്മിലുള്ള സൗഹൃദ സന്ദര്‍ശനം ശ്രദ്ധേയമായി. ഇനിയുള്ള അഞ്ച് വര്‍ഷം മുഖ്യമന്ത്രിയായി വി ഡി സതീശനും പ്രതിപക്ഷ നേതാവായി പിണറായി വിജയനും സഭയിലുണ്ടാകുമെന്നതും പ്രത്യേകതയാണ്.

തിങ്കളാഴ്ചത്തെ സത്യപ്രതിജ്ഞ ചടങ്ങിലേക്ക് പിണറായിയെ ക്ഷണിച്ചുവെന്നും വി.ഡി. സതീശൻ പറഞ്ഞു. മുൻ സർക്കാർ കൊണ്ടുവന്ന വികസനപ്രവർത്തനങ്ങൾ നിർത്തിവയ്ക്കില്ല, തെറ്റുകൾ ഉണ്ടെങ്കിൽ തിരുത്തും. തുടർ ഭരണമാണ് വരുകയെന്നും വി.ഡി. സതീശൻ പറഞ്ഞു. സതീശനുമായുള്ള കൂടിക്കാഴ്ചയ്ക്ക് ശേഷം പിണറായി വിജയൻ മാധ്യമങ്ങളോട് ഒന്നും സംസാരിച്ചില്ല. പിന്നീട് സംസാരിക്കാമെന്ന് പിണറായി മാധ്യമങ്ങളോട് പറഞ്ഞു.

കഴിഞ്ഞ ദിവസമാണ് കോണ്‍ഗ്രസ് ഹൈക്കമാന്‍ഡ് വി ഡി സതീശനെ മുഖ്യമന്ത്രിയായും സിപിഐഎം സംസ്ഥാന സമിതി പിണറായി വിജയനെ പ്രതിപക്ഷ നേതാവായും പ്രഖ്യാപിക്കുന്നത്. ആദ്യമായാണ് വി ഡി സതീശന്‍ മുഖ്യമന്ത്രിയും പിണറായി വിജയന്‍ പ്രതിപക്ഷ നേതാവുമാകുന്നത്. മുഖ്യമന്ത്രി സ്ഥാനത്തേക്ക് വി ഡി സതീശനെ ഹൈക്കമാന്‍ഡ് പ്രഖ്യാപിച്ചതിന് പിന്നാലെയാണ് പിണറായി വിജയനെ പ്രതിപക്ഷ നേതാവാക്കാന്‍ സിപിഐഎം തീരുമാനമെടുത്തത്.

### Related Links & Sources
- [Original Story Source](https://thalassery.truevisionnews.com/news/359593/chief-minister-designate-vd-satheesan-visited-the-residence-of-designated-opposition-leader-pinarayi-vijayan-and-said-that-the-development-works-brought-by-the-previous-government-will-continue)