തലശ്ശേരി: കതിരൂര്‍ ഡയമണ്ട്മുക്കില്‍ വെച്ച് ബൈക്ക് യാത്രികനെ അക്രമിച്ച് പണം തട്ടിയ ക്വട്ടേഷൻ സംഘത്തിലെ പ്രതി പിടിയിലായി. കണ്ണൂര്‍ ചിറക്കല്‍ സ്വദേശി നായിക്കന്‍ നടുക്കണ്ടി എന്‍.എന്‍ മുബാറക്കാ(24)ണ് കതിരൂര്‍ പോലീസിന്റെ പിടിയിലായത്. കതിരൂര്‍ പഴയ നിരത്തിലെ ബിനിഷിന്റെ പരാതിയിലാണ് പ്രതിയെ പോലീസ് അറസ്റ്റ് ചെയ്തത്. കുഴല്‍പ്പണം കൈയ്യിലുണ്ടെന്ന് കരുതി ബിനിഷിനെ മുബാറക്കിന്റെ നേതൃത്വത്തിലുള്ള നാലംഗ സംഘം കാറിലെത്തി കഴിഞ്ഞ ഞായറാഴ്ച തടഞ്ഞ് വെച്ച് പണം തട്ടിയെടുത്തത്. ബനിഷിന്റെ കൈയിലുള്ള ഒന്നര ലക്ഷം രൂപ സംഘം മോഷ്ടിച്ചിരുന്നു.
കതിരൂര്‍ ഡയമണ്ട്മുക്കില്‍ വെച്ച് ബൈക്ക് തടഞ്ഞ് നിര്‍ത്തിയ സംഘം ബിനിഷിനെ കാറിലേക്ക് ബലം പ്രയോഗിച്ച് കയറ്റുകയായിരുന്നു. കൂത്തുപറമ്പ് ഭാഗങ്ങളില്‍ ബിനീഷിനെയും കൊണ്ട് കാറില്‍ ചുറ്റിയ സംഘം കൈയ്യിലെ ഒന്നര ലക്ഷം രൂപ കവരുകയായിരുന്നു. പിന്നീട് യുവാവിനെ കതിരൂര്‍ പുല്യോട് ബി.എസ്.എന്‍.എല്‍ ഓഫീസിന് സമീപം ഇറക്കി വിട്ടു. കുഴല്‍പ്പണ ഇടപാടുകാരനായ ബിനീഷിന്റെ കയ്യില്‍ സംഭവ ദിവസം എട്ട് ലക്ഷം രൂപയുണ്ടായിരുന്നു. ഇത് മനസിലാക്കിയാണ് സംഘം മോഷണത്തിന് എത്തിയിരുന്നത്. എന്നാല്‍ ഈ സംഘം തട്ടിക്കൊണ്ട് പോകുന്നതിനു മുൻപ് ബിനീഷ് ബാക്കി തുക വിതരണം നടത്തിയിരുന്നു. പ്രതികളില്‍ മൂന്ന് പേരെ ഇനിയും പിടികൂടാനുണ്ടെന്ന് പോലീസ് പറഞ്ഞു.