---
title: "ഒരു സ്റ്റേഡിയത്തിന്റയത്ര വലിപ്പമുള്ള നാല് ഛിന്നഗ്രഹങ്ങള്‍ ഇന്ന് ഭൂമിക്കടുത്തേക്ക് പാഞ്ഞടുക്കുന്നു ; മുന്നറിയിപ്പുമായി നാസ "
english_title: "Four stadium-sized asteroids are hurtling toward Earth today; NASA with warning"
publisher: "thalasserynews.in"
canonical_url: "https://thalassery.truevisionnews.com/news/270689/four-stadium-sized-asteroids-are-hurtling-toward-earth-today-nasa-with-warning"
published_at: "2025-02-16T21:42:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/67b20f31d5d46_download.jpg"
keywords: []
---

# ഒരു സ്റ്റേഡിയത്തിന്റയത്ര വലിപ്പമുള്ള നാല് ഛിന്നഗ്രഹങ്ങള്‍ ഇന്ന് ഭൂമിക്കടുത്തേക്ക് പാഞ്ഞടുക്കുന്നു ; മുന്നറിയിപ്പുമായി നാസ 

> **Lead Summary:** ഒരു സ്റ്റേഡ‍ിയത്തിന്‍റെ വലിപ്പമുള്ളത് അടക്കം നാല് ഛിന്നഗ്രഹങ്ങള്‍ ഇന്ന് (ഫെബ്രുവരി 16) ഭൂമിക്കരികില്‍ എത്തുമെന്ന മുന്നറിയിപ്പുമായി നാസ. എന്നാല്‍ ഈ ബഹിരാകാശ പാറകളെല്ലാം ഭൂമിയെ തൊട്ടുപോലും നോവിക്കാതെ കടന്നുപോകും എന്നാണ് അനുമാനം. എങ്കിലും നാസയുടെ ജെറ്റ് പ്രൊപല്‍ഷ്യന്‍ ലബോററ്ററി നാല് ഛിന്നഗ്രഹങ്ങളെയും സസൂക്ഷ്മം നിരീക്ഷിക്കുന്നുണ്ട്.

## Article Content

ഒരു സ്റ്റേഡ‍ിയത്തിന്‍റെ വലിപ്പമുള്ളത് അടക്കം നാല് ഛിന്നഗ്രഹങ്ങള്‍ ഇന്ന് (ഫെബ്രുവരി 16) ഭൂമിക്കരികില്‍ എത്തുമെന്ന മുന്നറിയിപ്പുമായി നാസ. എന്നാല്‍ ഈ ബഹിരാകാശ പാറകളെല്ലാം ഭൂമിയെ തൊട്ടുപോലും നോവിക്കാതെ കടന്നുപോകും എന്നാണ് അനുമാനം. എങ്കിലും നാസയുടെ ജെറ്റ് പ്രൊപല്‍ഷ്യന്‍ ലബോററ്ററി നാല് ഛിന്നഗ്രഹങ്ങളെയും സസൂക്ഷ്മം നിരീക്ഷിക്കുന്നുണ്ട്.

1. 2025 ബിഎക്സ്1 (2025 BX1)

ഒരു വിമാനത്തിന്‍റെ വലിപ്പം കണക്കാക്കുന്ന 2025 ബിഎക്സ്1 ഛിന്നഗ്രഹമാണ് ഇന്ന് ഭൂമിക്കരികിലെത്തുന്നവയില്‍ ഒന്നെന്ന് അമേരിക്കന്‍ ബഹിരാകാശ ഏജന്‍സിയായ നാസ മുന്നറിയിപ്പ് നല്‍കുന്നു. ഏകദേശം 150 അടിയാണ് 2025 ബിഎക്സ്1 ഛിന്നഗ്രഹത്തിന് വ്യാസം കണക്കാക്കുന്നത്. ഭൂമിക്ക് ഏറ്റവും അടുത്തത്തെമ്പോള്‍ പോലും 1,720,000 മൈല്‍ അകലം നമ്മുടെ ഗ്രഹവുമായി ഈ ഛിന്നഗ്രഹത്തിനുണ്ടാകും എന്നതാണ് ആശ്വാസം.

2. 2004 എക്സ്ജി (2004 XG)

ഏകദേശം 160 അടി വ്യാസമുള്ള 2004 എക്സ്ജി ഛിന്നഗ്രഹവും ഇന്ന് ഭൂമിക്കരികിലൂടെ സുരക്ഷിതമായി കടന്നുപോകും. ഒരു വിമാനത്തിന്‍റെ വലിപ്പമാണ് ഈ ഛിന്നഗ്രഹത്തിനുള്ളത്. ഭൂമിക്ക് ഏറ്റവും അടുത്തെത്തുമ്പോള്‍ പോലും 2004 എക്സ്ജി ഛിന്നഗ്രഹം 3,710,000 മൈല്‍ അകലത്തിലായിരിക്കും.

3. 2024 യുഡി26 (2024 UD26)

ഇന്നെത്തുന്ന ഛിന്നഗ്രഹങ്ങളിലെ ഏറ്റവും ഭീമന്‍റെ പേര് 2024 യുഡി26 എന്നാണ്. ഒരു സ്റ്റേഡിയത്തിന്‍റെ അഥവാ ഏകദേശം 850 അടിയാണ് 2024 യുഡി26 ഛിന്നഗ്രഹത്തിന് നാസ കണക്കാക്കുന്ന വ്യാസം. ഭൂമിയില്‍ നിന്ന് 3,990,000 മൈല്‍ അകലത്തിലൂടെ 2024 യുഡി26 കടന്നുപോകുമെന്ന് കണക്കുകൂട്ടുന്നു.

4. 2025 സിഒ1 (2025 CO1)

ഏകദേശം 78 അടിയാണ്, ചെറിയൊരു വിമാനത്തിന്‍റെ വലിപ്പം കണക്കാക്കുന്ന 2025 സിഒ1 ഛിന്നഗ്രഹത്തിന്‍റെ വ്യാസം. ഭൂമിയില്‍ നിന്ന് 4,310,000 മൈല്‍ എന്ന സുരക്ഷിത അകലത്തിലൂടെ 2025 സിഒ1 കടന്നുപോകും എന്ന നാസയുടെ അറിയിപ്പും മനുഷ്യരാശിക്ക് ഇന്ന് ആശ്വാസ വാര്‍ത്തയാണ്.

### Related Links & Sources
- [Original Story Source](https://thalassery.truevisionnews.com/news/270689/four-stadium-sized-asteroids-are-hurtling-toward-earth-today-nasa-with-warning)